I helga: skål for oktoberfest!

Laurdag er det på med lederhosen og tyrolerflette. Det er klart for oktoberfest på Verkstaden.

- Det er sjuande gangen vi arrangerer oktoberfest. Det har blitt ein tradisjon, seier Lidvar Kurseth ved Verskstaden Bistro på Ikornnes. Laurdag, 20.oktober, venter han stinn brakke med 300 gjestar.

God stemning: Lidvar Kurseth. (Foto: Hanne Suorza)

Tradisjonen tru stiller bygdefolket svoltne på øl og pølse. Lidvar har 1500 liter på lager og 60 kilo bratwurst, krakauer, wiener og grill.

Dørene opnar klokka 21. Sykkylven Janitsjarorkester bles det heile i gang, slik som kvart år.

- Det er alltid eit høgdepunkt med ompa-ompa og svingande allsang. Messingblåsen gir god stemning, folk svingar med glasa og syng frå sangheftet, seier Lidvar, som har rigga til eit ekstra telt med golv og scene. Ut på kvelden blir det musikk og dans med sykkylvsbandet Free Bird.

Billetsal blir kun på døra. For å unngå kø foreslår Lidvar at flest muleg betaler kontant.

- For eit par år sidan var her så mykje folk at det stod att jenter med lange lyse fletter, fregner og tyrolerantrekk. Men eg trur dei kom seg inn til slutt, minnast han.

Oktoberfest er ein tradisjon som kjem frå Bayern i Tyskland. I følge oktoberfest sine nettsider starta historia 12. oktober i 1810, då kronprins Ludwig gifta seg med prinsesse Therese av Saxony-Hildburghausen.

Festlegheitene blei etterkvart ein festival for heile Bayern. Dei første tiåra med lite underhaldning, men i 1818 blei det satt opp karusell og disser. Etterkvart kunne tyskarane slukke tørsten i øltelt, og hygge seg i matboder, på marknad og tivoli.

I dag er Oktoberfesten verdas største festival. Over seks millionar menneske besøker Oktoberfesten i Munchen kvart år. I 2006 var det 100 000 turistar frå Japan som reiste til Tyskland for å delta på Oktoberfest.

Gjengen på jobb for nokre år sidan: Yvonne Sandmo, Marius Nordang, Bjørn Utgård, Bjørg Kurseth, Bjørg Heitmann, Lidvar Kurseth og Harald Nygård. (Foto: Jon Reidar Kurseth)

Skriv kommentar
Anonyme kommentarar blir ikkje publisert. Vi oppfordrar til positivitet i kommentarfeltet.

Skriv navnet ditt

Navn er et nødvendig felt

Skriv ein gyldig e-postadresse

E-post er et nødvendig felt

Skriv ein kommentar

Brabygd.no © 2018 | Ver venleg og oppgje kjelde ved kopiering av tekst, foto og video. Brabygd har ikkje ansvar for innhald på eksterne nettsider som det blir lenka til.